Ներաճող եղունգներ

Ներաճող եղունգը հիվանդություն է, որի ժամանակ եղունգը դեպի կողք է աճում` մտնելով եղունգի թմբիկի մեջ: Այս հիվանդությամբ տառապում են շատերը, եւ հիմնականում ոտնաթաթի մեծ մատի եղունգն է նման խնդիր ստեղծում:

Որպես կանոն՝ ներաճող եղունգը մի քանի էտապ է անցնում: Սկզբում հիվանդությունն իր մասին զգացնել է տալիս քայլելու ժամանակ, հատկապես նեղ կոշիկի մեջ: Հետո կարմրում է ու այտուցվում, իսկ ժամանակին դա չկանխելու դեպքում, սկսում է եղունգից թարախային արտադրություն գալ: Շատ հաճախ մարդիկ փորձելով խնդիրը լուծել` ավելի կարճ են կտրում եղունգը, խորացնելով առանց այն էլ լուրջ իրավիճակը: Իսկ այս դեպքում միշտ էլ մեծանում է ինֆեկցիայի հավանականությունը: Հիվանդի անտարբերությունը կարող է շատ վտանգավոր բարդությունների հանգեցնել` հյուսվածքները կարող են նեկրոզվել եւ հասցնել ընդհուպ մեծ մատի գանգրենայի: Այս հիվանդությունը բուժելու ամենալավ ժամանակը ամառվա եղանակն է, քանի որ ամռանը հիմնականում բաց ու ազատ կոշիկի մեջ է լինում ոտքը:

Եղունգի ներաճելու պատճառները մի քանիսն են` եղունգի ոչ ճիշտ, չափից խորը կտրելը, նեղ կոշիկ կրելը` հատկապես բարձրակրունկ: Այս ժամանակ եղունգը ուժեղ սեղմվում է թմբիկի մեջ: Երբեմն էլ օրգանիզմը հակվածություն է ունենում եղունգների ներաճելուն: Եղունգի ներաճ է լինում, եթե ոտքը սնկային հիվանդություն է ձեռք բերում, կամ, եթե որեւէ հարվածի է ենթարկվում: Եթե այս երեւույթը շարունակական բնույթ է կրում, ապա պետք է հրաժարվել նեղ կոշիկներ հագնելուց ու եղունգները շատ կարճ կտրելուց: Իսկ եղունգի ձեւը պետք է լինի քառակուսի, բայց ծայրերը մի քիչ կլորավուն: Նման իրավիճակներից խուսափելու համար անհրաժեշտ է նաեւ տանը պրոֆիլակտիկ պրոցեդուրաներ կատարել` քլորոֆիլիպտով եւ յոդուկսունով: Իսկ եթե այնուամենայնիվ ներաճած եղունգը շարունակում է ձեզ անհանգստացնել, ուրեմն անհապաղ պետք է դիմել բժշկի:

Ժամանակակից բժշկությունն այս խնդրի լուծման մի քանի տարբերակ է առաջարկում, այդ թվում` վիրաբուժական միջամտությամբ ներաճած եղունգի հեռացումը: Չնայած այս մեթոդը բազմաթիվ բացասական կողմեր ունի` սկսած հետվիրահատական ցավերից, որ կարող է տեւել 2 շաբաթ, վերջացրած` ապաքինման երկարատեւ գործընթացից: Մյուս տարբերակը ներաճած եղունգի լազերային վիրաբուժությունն է, որի ժամանակ հեռացվում է եղունգի միայն ներաճած մասը:

Հարցեր, պատասխաններ, մեկնաբանություններ